Elikagaien Berrikuntzaren Transferentzia Euskadin

2023-03-16

Euskadiko Elikaduraren Balio Kateko hainbat enpresak, tartean Leartikerrek, berrikuntzan eta I+Gn oinarritutako proiektuen emaitzak aurkeztu zituzten pasa den martxoaren 9an, Euskadiko nekazaritzako elikagaien eremuan berrikuntza eta ekintzailetza aktibatzeko inspirazio-iturri izateko asmoz.

Eusko Jaurlaritzako Ekonomiaren Garapen, Iraunkortasun eta Ingurumen Sailak antolatutako "Elikagaien Berrikuntzaren Transferentzia Euskadin" topaketan, BRTA aliantzako hainbat kidek parte hartu zuten (Azti, Neiker, Leartiker eta Gaiker), baita Bilboko Ostalaritzako Goi Eskolak eta BCCInnek ere.

Erakunde horiek izan ziren Euskadiko Elikagaien Balio Katearen merkatuan eragina izan zuten berrikuntza-proiektuen emaitzak aurkezteko arduradunak: C-Anchoas (Azti), Isauki (Bilboko Ostalaritzako Goi Eskola), Colza eta NutFood (Neiker), SENOX ontzi eta bilgarriak (Gaiker), Eye-Tracker Teknologia (BCCI) eta PREBI 60+ (Leartiker).

PREBI60+ eta NUTFOOD (Neikerrek aurkeztua) Leartikerrek parte hartu duen, edo parte hartzen ari den, proiektuak dira. Alde batetik, PREBI60+ “Iturri berrietatik jarduera prebiotikoa duten bioaktiboak erauzteko kontsumitzaile seniorrari zuzendutako bio-findegia”, gaur egun garatzen ari den proiektua da, eta horren bidez, oinarri teknologikoko enpresa berri bat sortu nahi da, kontsumitzaile seniorrentzako iturri berrietatik jarduera PREBIOTIKOA duten bioaktiboak ateratzeko. Bestalde, NUTFOOD proiektua “Osasunerako onuragarriak diren haragi- eta esneki-produktuen ikerketa eta garapena, animaliak olio-haziekin elikatuz”, 2022an bukatu zen. Ekimen honen gakoa animalien elikaduran datza, tokiko ekoizpeneko olio-hazien olio eta opilen burutu baitzen.

Eusko Jaurlaritzak, espezializazio adimenduneko Europako RIS3 programa aplikatuz, ekintzailetzarako interes handiko berrikuntza-eremuak lantzen ditu, hala nola elikaduraren araberako nutrizio pertsonalizatua, zahartze osasungarria, iturri alternatibo berrien garapena edo elikadura-ekipoen robotika eta teknifikazioa. Guztira 30 milioi euro bideratuko dira Elikaduraren Balio Katearen berrikuntzara, eta horietatik 6 milioi euro jardunaldi honetan aurkeztu diren bezalako proiektuak babesteko bideratuko dira.

Izan ere, Elikaduraren Balio Kateak, pandemiaren eta, batez ere, Ukrainaren inbasioaren ondorioz, bizi izan duen ziurgabetasun garai horren ondoren, orain arreta elikagaien ekoizpenaren jasangarritasunean jarrita dago. Bittor Oroz Nekazaritza, Arrantza eta Elikagai Politikako sailburuordeak azpimarratu zuen bezala, oso garrantzitsua da digitalizazioa eta teknologia enpresentzat erronka izatea. “Digitalizazioa eta teknologia enpresen erronken artean egon behar dira; aldaketa-prozesu horietan, berrikuntza izan behar da enpresak kontsumitzaileen garai eta eskari berrietara egokitzen lagunduko duen palanka”.

Jardunaldian Juan Viñas Orta marketin eta berrikuntza adituak ere parte hartu zuen, “Berrikuntza deitu arrakasta denean. Hori lortzeko gakoak” hitzaldiarekin, eta Raul Perez Iratxeta Eusko Jaurlaritzako Elikagaien Kalitate eta Industriako zuzendariak Elikadura Jasangarriaren RIS3 Estrategia aurkeztu zuen.