Patxaferm, sagardogintza iraultzeko bidean patxaren aprobetxamenduari esker edari hartzitu berritzaileak garatuz

Elikagaien industriako azpiproduktuen aprobetxamendua eta balorizazioa asko entzuten den gai bat da prozesuen jasangarritasunaz eta ekonomia zirkularraz ari garenean. Ildo horretatik, 2024an, Eusko Jaurlaritzaren Berriker programak emandako laguntzari esker, Leartikerrek Patxaferm ikerketa-proiektua abiarazi zuen sagardo ekoizpenean sortzen den "sagar patxa" deitutako azpiproduktuari, bigarren bizitza bat bilatzen saiatzeko.

Azukre hartzigarrietan eta polifenoletan aberatsa den azpiproduktu hau lehengai ezin hobea da hartzidura prozesuetarako. Patxaferm proiektuak zuzendutako hartzidura misto bat egonkortu eta martxan jarri nahi izan du, sagarraren patxan geratzen diren nutrienteak aprobetxatuz, alkoholik gabeko edo alkohol graduazio baxuko edari berritzaileak garatzeko.

Patxatik abiatuz edari hartzitu berritzaile baterantz

Proiektuan zehar, mazerazio eta optimizazioaren bidez hartzidurarako interesgarriak diren konposatuak erauzteko prozesurik onena definitu da. Muztio optimizatua lortu ondoren, bakterioen eta legamien kultibo mistoak inokulatu dira alkoholik gabeko edarien prototipoak egiteko. Azterlan honetan, hartzidura-prozesuak monitorizatu egin dira, patxa-estraktuan izandako aldaketak ezaugarritzeko eta ezagutzeko asmoz.

Kefirra eta kombutxa bezalako edari ereduetan inspiratutako mikroorganismoak hautatu eta aztertu dira. Edari horiek alkoholik gabeko edo alkohol graduazio txikia duten edariak sortzen dituzten bakterio eta legamien komunitate mikrobianoetan duten edukiagatik ezagutzen dira.

Alderdi horiek produktuaren bideragarritasun-analisi baten bidez eta analisi sentsorial batekin ebaluatu dira. Prozesu hau gastronomiaren eta sukaldaritzaren sektoreko adituekin lankidetzan burutu da, hondakin horren sortzaile nagusiak diren sagardogileekin batera.

Graduazio alkoholiko txikiko edari hartzitu berritzaileak

Horrela, emaitza gisa, ezaugarri sentsorial interesgarriak dituzten graduazio alkoholiko txikiko edari berritzaile batzuk lortu dira: lehengaiaren zapore eta aroma bereizgarrien oreka, testura eta gorputz sendoak eta zaporearen iraunkortasuna. Horiek guztiek esperientzia sentsorial osoa ahalbidetzen dute.

Emaitzen difusioa

Gaur egun, proiektuaren emaitzak sagardogintza sektoreko eragileei ezagutarazteko difusio ekintzak antolatzen ari dira, proiektuaren aurrerapenak aurkezteko eta beren enpresetan emaitzak inplementatzeko aukerari buruzko proposamenak entzuteko. Emaitza guztiak publikoak izango dira Leartikerren komunikazio kanalen bidez.

Leartikerretik lortutako emaitzen balorazioa oso ona egin da, eta elikagai hartzituak garatzeko lanean jarraituko dugu berrikuntzarako eta azpiproduktuen balorizaziorako ildo estrategiko gisa.