Zelaitik mahaira. BELARDITIK ETXERA proiektuak tokiko haragi-sektorearen eraldaketa bultzatzen du.

BEDARBIDE, inguruko abeltzainak biltzen dituen elkarteak, urteak daramatza abeltzaintzako ustiategien errentagarritasuna hobetzeko lanean, helburu argi batekin: gaur egun jarduera horretan dihardutenen bideragarritasun ekonomikoa bermatzea eta etorkizuneko belaunaldientzat sektore sendo bat uztea. Hori lortzeko, ekoizpen-kostuak murriztera eta merkaturatzeko bide laburra sustatzera bideratu dituzte beren ahaleginak, produktua zuzenean kontsumitzaileengana hurbilduz.

Hala ere, bide honek zailtasunak izan ditu. Garrantzitsuenetako bat haragia eraldatzeko gertuko azpiegitura eza izan da, tokiko produktuarekin konprometitutako kontsumitzaileen eskaera gero eta handiagoari eta lehen harategietan bertan egiten ziren haragi-produktu tradizionalen oroitzapenari erantzuteko gaitasuna mugatuz.

Behar horri erantzuteko, BEDARBIDE elkarteak 2024ko irailean inauguratu zen BELARDI haragi eraldaketarako zentroaren sorrera bultzatu zuen. Zentro hori izateak aldaketa nabarmena dakar tokiko elikadura ekosisteman, haragiaren balio katea osatzeko eta lehen bideragarriak ez ziren proiektuak berreskuratzeko aukera ematen baitu. BELARDIk azpiegitura emateaz gain, berrikuntzaren eta produktuen dibertsifikazioaren atea irekitzen du, lurraldearen nortasun gastronomikoa indartuz.

Hurbileko eta kalitatezko haragi-produktuen gama berria

Beste urrats bat emateko asmoz, BELARDITIK ETXERA proiektua sortu da, non Leartikerrek bat egiten duen ezagutza eta teknologia emateko funtsezko hiru arlotan: BELARDI produktu gama berriaren identifikazioa eta definizioa, haragi produktu berrien garapena eta kalitatearen ebaluazioa eta baliozkotzea. Lankidetza horren helburua ez da soilik eskaintza hobetzea, baita produktuek estandar gorenak betetzen dituztela bermatzea ere, tokiko esentzia eta kontsumitzaileen konfiantza mantenduz.

NPB 2023-2027 Landa Garapeneko Laguntzen (Eusko Jaurlaritza - FEADER) barruan kokatzen den ekimen honetan, BEDARBIDE Elkartea, Leartiker S.COOP, ATEZABAL koop.txikia eta Endika Ejejalde abeltzain eta harakinak parte hartzen dute, azken honek tradizioarekiko eta berrikuntzarekiko esperientzia eta konpromisoa eskaintzen dituelarik. Elkarrekin, tokiko abeltzaintza-sektorea bizirauteko, indartzeko eta etorkizunera proiektatzeko lan egiten dute.

Larreak kontsumitzaileekin berriz konektatuz

Belarditik Etxera ekimena helburu sinple eta sakon batekin sortu da: larreak eta kontsumitzaileak berriro batzea. Errezeta tradizionaletan oinarritutako haragizko elikagai artisauen bidez, pertsona bakoitzak zaporea baino askoz gehiago transmititzen duten elaborazioez gozatu ahal izatea bilatzen da. Mokadu bakoitzak paisaiaren, abeltzaintza-ofizioaren eta landako produktuak zintzotasunez eta arretaz elikagai arduratsu eta zaporetsu bihurtzen dituzten abeltzainaren eskuen inguruko historia kontatzen du.

Ideia horrekin, hainbat esperientzia gastronomiko antolatu dira, proiektua herritarrengana hurbiltzeko. Hala, joan den abenduaren 6an Urduñako merkatuan dastaketa bat egin zen, eta hurrengo egunean, BEDARBIDEren instalazioetan bertan, hanburgesa eta garagardoa dastatu ziren. Datorren abenduaren 20an, Gabon jaiak baino lehentxeago, dastamenaren laborategia izeneko jarduera bat ere egingo da Urduñan, mokadu on batekin sentsazioak esperimentatzeko eta partekatzeko gune bat.

Ekintza horiekin, kontsumitzaileek errezeta tradizionalekin eta ingurunea errespetatzen duen eta landaren eta pertsonen arteko loturak indartzen dituen egiteko modu batekin topo egiteko aukera dute.

BELARDITIK ETXERA proiektu bat baino askoz gehiago da: jasangarritasunaren, berrikuntzaren eta landaren eta mahaiaren arteko lotura zuzenaren aldeko apustua da. Tokiko ekonomia indartzen duen, jakintza tradizionalak berreskuratzen dituen eta hurrengo belaunaldiek sektore sendo eta aukeraz betea aurkituko dutela ziurtatzen duen ekimena da.