Plant-based produktuak garatzeko, tokiko lekaleen irinak balorizatzera bideratutako LEKALEAK proiektua amaitu da

2024-01-30

Europar Batasuneko FEADER funtsek finantzatuta eta Eusko Jaurlaritzako Nekazaritzako, Arrantzako eta Elikadura Politikako Sailburuordetzaren Lankidetza Laguntzaren bidez, LEKALEAK proiektuak lehengai berrien ekoizpenean, teknologian eta elikagaien eraldaketan esperientzia duten EAEko elikadura-kateko hainbat eragile inplikatu ditu.

LEKALEAK proiektua amaierara iritsi da tokiko lekale-irinen barietateak ekoiztu eta balorizatzea lortuz. Proiektuaren helburu nagusia lortutako irin barietate horrek plant-based produktuen garapenean aplikatzea izan da.

Arabako Nekazari eta Abeltzainen Elkarteak (UAGA) zuzenduta, proiektuan parte hartu duten gainerako erakundeak hauek izan dira: BASQUE FOOD CLUSTER, euskal elikadura-katearen erakunde erreferente gisa; ahatearen eta haren eratorrien produktuetan espezializatutako DELICASS enpresa; Arabako Laboreen Elkarte Alternatiboa; NEIKER-Nekazaritza Ikerketa eta Garapenerako Euskal Erakundea; eta Leartiker Zentro Teknologikoa. Horrela, proiektuaren ardura duen partzuergoak hainbat arloko esperientzia eta ezagutza uztartu ditu, lehengai berrien ekoizpena eta eraldaketa, eta elikagaien teknologia eta eraldaketa, besteak beste.

Leartikerrek plant-based hanburgesen hainbat prototipo garatu ditu tokiko lekale-irinak erabiliz, eta, ondoren, Delicass enpresan aurre-eskalatze froga egin du, etorkizunean bere produktu-sorta dibertsifikatu ahal izan dezan eta gaur egun kontsumitzaileek gero eta gehiago eskatzen dituzten plant-based hanburgesak merkatuan eskaintzeko.

Donostian eta Bilbon egindako bi focus group-etan , proiektuan garatutako hanburgesa prototipoak dastatu ahal izan dituzte kontsumitzaile potentzialek. Emaitzak, oro har, positiboak izan dira, bereziki hanburgesen formuletako bat nabarmendu delarik.

Proiektuaren emaitza orokor bezala, EAEko nekazaritza-ekoizpena dibertsifikatzea eta negozio-eredu berri bat bultzatzea lortu da: elikagaien industrian landare jatorriko proteina-iturri gisa erabiltzeko tokiko lekale-irinak lortzea. Halaber, irin horiek erabiliz produktu berriak ere garatu dira, horrela, dibertsifikazioan lagunduz eta merkatuan plant-based produktu berrien eskaintza zabalduz.