Proteina alternatibo jasangarri eta osasungarrietan berritzen

Urtebeteko lanaren ondoren, JASON - Elikadura osasungarri eta jasangarriaren sustapena (JASangarri eta OsasuNgarri) proiektua amaitu da.

Ausolanek gidatuta eta Eroskirekin lankidetzan, proiektu honek hainbat erronka planteatzen zituen, hala nola plat-based soluzioak garatzea, horretarako proteinatan aberatsak diren onddo-biomasa hartzitutik lortutako osagaiak oinarri hartuta. Ekimena Mondragonen Zientzia eta Teknologia Planeko laguntzek finantzatu dute, eta Leartiker izan da plan hori teknikoki gauzatzeaz arduratu den partner teknologikoa.   

Proteina-balio handiko plant-based elikagaiak

INNOMY start-uparen eskutik, ekimen honen helburua proteina fungikoan aberatsa den osagai bat ekoiztea eta ateratzea izan da, prozesu bioteknologikoetatik abiatuta, balio proteiko handiko plant-based elikagaiak egiteko osagai gisa erabil daitekeena. Prozesu horretan, kalitatezko proteina bat lortzeko lan egin da: aminoazidoen profil hobetua eta propietate teknofuntzional optimoak dituen proteina bat, hainbat elikagai-matrizetan sartzeko balioko zuena.

Proiektuak proteinen purifikazioa eta egonkortzea hobetzea ahalbidetu du, spray drying bezalako metodoak erabiliz, horrela, elikagai berrien garapenean erabiltzeko prest dagoen osagai bat lortuz. Prozesuaren zati hau EKONEK enpresarekin lankidetzan egin da.

Leartikerrek, halaber, mota askotako elikagaiak garatu ditu eskala pilotuan, lortutako proteina berria dosifikatuz, plater prestatuen, pastelgintzako eta okintzako produktuen eta postre beganoen sektoreetarako soluzioak lortzeko. Egindako produktuetako batzuk fruitu lehorren eta oloaren granola bat, albondiga beganoak edo brownie begano bat izan dira. Merkatuan txertatzeko aukera handia duten produktuak, proteinatan aberatsak diren elikagaien egungo eskaerari erantzuten diotenak.

Proteinatan aberatsak diren elikagaien eskaria gorantz

Proteinetan aberatsak diren elikagaien merkatua nabarmen hazten ari da azken urteotan, funtsezko faktoreen ondorioz, hala nola osasunari buruzko kontzientzia, elikadura ohituren aldaketa, landare proteinak hobestea eta jateko prest dauden eta prestatzeko errazak diren produktuen kontsumoaren igoera.

Eskaera horri erantzunez, Ausolanek eta Eroskik elikadura osasungarriagoa eta jasangarriagoa sustatu nahi dute. Horregatik, proiektuaren esparruan proteina fungikoen ekoizpenaren eta erauzketaren inguruan sortutako ezagutzak elikagaien merkatua irauli eta etorkizun jasangarriago bat lortzen lagundu dezakeela uste dute.

Leartikerren Mondragoneko elikagaien sektoreko enpresekin lankidetza proiektuak gauzatzen jarraitzen dugu, gure ingurunean ekoizten diren elikagaien propietate osasungarriak eta ekoizpen jasangarria hobetzea bilatzen duten ekimenak garatzeko.