Produktuak hartzidura prozesuen bidez balorizatzeko soluzio tekniko erraz, jasangarri eta irisgarriak

FERMAVAL Interreg POCTEFA proiektua Espainiaren eta Frantziaren arteko mugako eskualdeek partekatutako erronka bati heldu nahian sortu da. Oraindik gutxi ustituta dauden lehengai eta azpiproduktu komunak ekoizten diren lurraldeak dira. Horregatik, proiektuaren helburua baliabide horiei hartzidura prozesuen bidez balioa ematea da, tokiko enpresa txikiak eta ekoizleak nagusitzen diren eskualde horietara bereziki egokitzen den low-tech prozesu batekin (soluzio errazak, jasangarriak eta irisgarriak).

Interreg POCTEFA mugaz gaindiko lankidetzarako Europako programak finantzatutako ekimen horren bidez, ezaugarri organoleptiko eta nutrizional hobeak dituzten elikagai hartzituak garatuko dira.

Mugaz gaindiko nekazaritzako elikagaien sektorearen gaitasunak indartzeko, ekoizleen eta kontsumitzaileen beharrak aztertzeaz, merkatuaren potentziala aztertzeaz eta produktu berritzaileak garatzeaz gain, proiektuak aurreikusten du lineako prestakuntza moduluak eta modulu presentzialak sortzea eta laguntza pertsonalizatua ematea, tokiko gaitasunak indartzeko eta bi herrialdeen arteko ezagutzen transferentzia sustatzeko.

FERMAVAL proiektuak POCTEFA eremuko nekazaritza sektorearen lehiakortasuna eta erresilientzia indartu nahi ditu, mugaz gaindiko merkatuan potentziala duten produktu berrien garapena bultzatuz. Horrela, proiektuak elikagai hartzituen eskaintza zabaltzen eta dibertsifikatzen lagunduko du, ingurunearekiko errespetuan oinarritutako ikuspegi osasungarriago batekin bat eginez.

Partzuergoa

Hiru lurraldetako lau bazkide biltzen ditu: Ecole de Ingenieurs de Purpan eta AREA-Association Regionale Des Entreprises Alimentaires (Okzitania); Leartiker (Euskadi); eta, CETT-Barcelona School of Tourism, Hospitality and Gastronomy (Katalunia). Eratutako partzuergoak beste elkarte eta agente batzuen laguntza izango du, POCTEFA eremuan banatutako lurraldekako lana ahalbidetzeko.

Joan den otsailean proiektua abiarazteko bilera egin zen Leartikerren egoitzan (Markina-Xemein), proiektuko bazkideekin batera. Topaketa horrek, halaber, EkoLurra Euskadiko elikagai ekologikoen kontrol, ziurtapen eta sustapenerako erakunde ofizialaren instalazioak bisitatzeko aukera eman zuen, baita Barrenetxe ere, Euskal Herriko barazki tradizionalak ekoizten dituen nekazarien kooperatiba.