Joan den otsailaren 2an, INNTERACT proiektuaren abiarazte-bilera ospatu genuen, Leartikerren instalazioetan (Markina-Xemein, Bizkaia). Interreg POCTEFA programaren mugaz gaindiko ekimen honek osasun arloko berrikuntza bultzatzea du helburu, Ehun Ingeniaritzan eta Medikuntza Birsortzailean oinarritutako teknologia aurreratuen garapenaren, balidazioaren eta transferentziaren bidez.

Jardunaldian hamar bazkidek parte hartu zuten; Espainiatik eta Frantziatik etorritako erakundeek elkarlanean arituko dira proiektuak iraungo duen hurrengo hiru urteetan:

• Leartiker (proiektuaren koordinatzailea)
• Biogipuzkoa
• BHC – Basque Health Cluster
• Nafarroako Unibertsitatea (UNAV)
• DIVA Expertise
• Baiona–Euskal Herriko Merkataritza eta Industria Ganbera (CCIBPB)
• Toulouseko Unibertsitate Ospitalea (CHUT)
• BioTis – Inserm U1026
• Cosmetic Valley (CV)
• Montpellierreko Unibertsitate Ospitalea (CHUM)

Bileraren baitan, erakunde bakoitzak proiektuan izango duen rola aurkeztu zuen. Horrez gain,  INNTERACT egituratzen duten sei jarduera estrategikoen mugarri nagusiak berrikusi ziren: proiektuaren kudeaketa, komunikazioa, eskualde-testuinguruaren analisia, gailu medikoen balidazioa, merkaturatze-prozesurako transferentzia eta TissueNet mugaz gaindiko sarearen sorrera.

Kontsortzioak osasun-ikerketaren emaitzak industria-sareraino eramatearen garrantzia nabarmendu zuen, POCTEFA lurraldearen lehiakortasuna sendotuko duten teknologia aurreratuen adopzioa erraztuz.

Ibilbide-orri bateratua ezartzeko aukera ezin hobea izan zen bilera, hala nola, lankidetza-ildoak sendotzeko eta hiru gailu mediko berritzaile garatu eta balidatzeko lehen urratsak emateko ere. Horrez gain, eragile zientifikoak, klinikoak eta industrialak konektatuko dituen sare baten oinarriak jartzeko balio izan zuen.

INNTERACT proiektua berrikuntza biomedikoa bizkortzeko eta mugaz gaindiko lankidetza indartzeko apustu estrategikoa da, osasunaren etorkizunerako funtsezkoa den eremu batean.

__________________

INNTERACT proiektua Europar Batasunak % 65ean kofinantzatua dago, Espainia-Frantzia-Andorra Interreg VI-A Programaren bidez (POCTEFA 2021-2027). POCTEFAren helburua Espainia-Frantzia-Andorra mugako eremuaren integrazio ekonomiko eta soziala indartzea da.