Goierriko baratzezain eta frutazainen lehengaiak eraldatzeko produktu-sorta berria aurkeztu da GOIZANE proiektuaren baitan

Goizane Misioak proiektuaren baitan garatutako produktu berriak Ordiziako Azokan aurkeztu ziren pasa den urriaren 7an, baina ekimenaren benetako balioa produktu horietatik harago doa: Goierri eta Urola Garaiko lehen sektorea sendotzeko, tokiko lehengaiak eraldatzeko eta ekoizleei merkaturatze aukera berriak eskaintzeko sortutako lankidetza-eredua da.

Gipuzkoako Foru Aldundiaren “Etorkizuna Eraikiz – Misioak” programak (GFA) lagundutako egitasmo honen erronka nagusia Goierri eta Urola Garaiko tokiko produktuen ekoizpena handitzeko baldintzak sortzea izan da. Horretarako, eskualdeko lehen sektoreko eragileak, erakundeak eta ezagutza-zentroak elkartu dira tokian bertan sortzen diren lehengaiei balio erantsia emateko eta haien aprobetxamendua maximizatzeko.

Uztaola Goierriko lehen sektoreko ekoizleen arteko elkarlanetik sortutako egitura kolektiboa da, eta tokiko ekoizleen lehengaiak eraldatu eta merkaturatzeko aukerak sortzea du helburu. Zaldibiako Goizane eraldaketa-zentroan du bere egoitza, ekimen honetako berebiziko garrantzia izan duen eraikina.

Orain arte sagarraren eraldaketari lotutako jarduerak ziren nagusi zentroan, baina proiektu honen bidez instalazioaren erabilera dibertsifikatzea eta urte osoan jarduera ekonomikoa sustatzeko aukera berriak aztertu dira. Helburu horrekin, Uztaola Elkarteko baratzezain eta frutazainek ekoiztutako lehengaiak oinarri hartuta produktu berriak garatu dira.

Garatutako produktu-sortaren definizioan, merkatuaren beharrei eta ekoizleen errealitateari erantzuten dieten irtenbideak lehenetsi dira. Izan ere, produktu fresko gisa irteera ona duten lehengaiek ez dute normalean eraldaketaren beharrik; horregatik, arreta berezia jarri zaie biltegiratzeko zailtasunak dituzten edo ekoizpen-puntu handiak sortzen dituzten lehengaiei.

Ikuspegi horretatik, Uztaolako ekoizleen lehengaiak balorizatzeko eta urte osoan merkaturatzeko aukera berriak sortzeko asmoz, hainbat produktu garatu dira: sagar-konpota gozoa, sagar gozoa, fruitu gorrien marmelada, kalabaza eta sagar chutneya, tomate saltsa, pistoa eta kalabaza purea. Produktu horiek lehengaien aprobetxamendua handitzeaz gain, Goizane eraldaketa-zentroaren jarduera dibertsifikatzeko eta urte osora hedatzeko aukera eskaintzen dute.

Tokiko elikadura-sistema indartzeko estrategia

Produktu-lerro berrien garapena Barnetik Elikatzen (Goieki, Uggasa, Goimen eta Biziola) lankidetza-ekimenaren baitan egin da, Goierriko lehen sektorea indartzea eta tokiko elikadura-sistema sendotzea ardatz duen egitasmoa, eta Elkolab eta Leartikerren laguntza ere izan dute prozesua aurrera eramateko.

Ordiziako Azokan egindako aurkezpenak, beraz, azken hilabeteetan garatutako produktuak ezagutzera emateaz gain, lankidetzan oinarritutako eredu baten emaitzak erakutsi ditu. Eredu horrek berrikuntza, teknologia eta tokiko ekoizpena uztartzen ditu lehen sektore lehiakor eta jasangarriago baterantz aurrera egiteko.

Ildo horretan, proiektuak helburu estrategikoago bati erantzuten dio: lehen sektoreko ekoizleei eraldaketarako azpiegitura eta tresna kolektiboak eskaintzea, tokian sortzen den balio ekonomikoa eskualdean bertan gera dadin eta baserritarren jarduera ekonomikoa indartu dadin.

Leartikerren ekarpena

Leartikerrek elikagaien garapenean eta eraldaketa-prozesuen optimizazioan duen ezagutza teknologikoa jarri du egitasmo honen zerbitzura. Helburua tokiko ekoizleen lehengaiei balio erantsia emango dieten produktu bideragarriak garatzea izan da, betiere segurtasuna, kalitatea eta merkaturatzeko aukerak bermatuz. Lan honetan, produktu berrien formulazioa zein ekoizpen-prozesuen diseinua landu dira, eta garatutako produktuen tratamenduak eta kalitatea balidatu dira.

Garatutako produktuek ekoizleen lehengaien aprobetxamendua handitzeaz gain, soberakinak balorizatzeko eta Goizane eraldaketa-zentroaren jarduera urte osora hedatzeko aukera eskaintzen dute.

Leartikerren betebeharra egitasmo honetan bukatu da. Berrikuntza eta ezagutza teknologikoa tokiko lehen sektorearen zerbitzura jarri ditu, beste behin, ekoizleen lehiakortasuna indartzen eta eskualdean sortutako balioa bertan mantentzen laguntzeko.