BASQUE NEB DAYS: praktika onak, finantzaketa-aukerak eta benchmarking txostenak, Euskadiko habitat-sektorean proiektu berritzaile berriak sortzeko

2024-03-25

Joan den ostiralean diziplina arteko foro batean parte hartu dugu, eta bertan bildu ziren eraikitako ingurunearen diseinuan, etxe barrutik hasi eta lurralde-plangintzaraino, esku hartzen duten eragile guztiak.

BASQUE NEB DAYS izena duen bi eguneko ekitaldia, kasu arrakastatsuak, finantzaketa-aukerak eta benchmarking txostenak partekatzeko topagune bihurtu da, parte-hartzaileen artean proiektu berritzaile berriak sortzeko asmoz.

Euskadiko ekipamendu, diseinu eta zuraren sektoreko enpresa nagusiak biltzen dituen HABIC klusterrak antolatutako ekimena da BASQUE NEB DAYS. New European Bauhaus (NEB) delakoaren kontzeptuak ezartzeko aukerak eta erronkak eta Euskadiko hiri-diseinuko eta arkitekturako teknologia berriak aztertzea du helburu.

Josu Goikoetxea Leartikerreko Berrikuntza Estrategikoko arduradunak ordezkatu du Leartiker ekitaldi honetan. Bertan, HABICerako garatu dugun benchmarking txosten bat aurkeztu du. Azterlan honetan, altzarietan, eraikuntzan eta beste esparru batzuetan arrakasta izan duten kasuak identifikatu ditugu, altzari eta eraikuntzarako material ekoberritzaileak, fabrikazio gehigarria eta adimen artifiziala erabili diren kasuak, hain zuzen ere.

Txosten hau HABIC klusterraren NewBasquehaus proiekturako egin da, Europarekin partekatutako habitat jasangarri, inklusibo eta digitalerantz igarotzeko euskal ekosistemaren 4.0 materialen eta prozesuen eskaintza eta eskari teknologikoaren arteko topagune izan nahi duen ekimena. New European Bauhaus Europako Batzordearen ekimenaren barruan kokatzen den proiektu honek, diseinatzaileak, arkitektoak, artistak eta sormeneko beste profesional batzuk zientzia, teknologia eta ingeniaritzako adituekin biltzea du helburu, bizitza-ingurune iraunkorragoak, inklusiboagoak eta ederragoak nola sor daitezkeen aztertzeko. Ekimenaren helburua berrikuntza eta sormena sustatzea, Europako balioak eta nortasuna sustatzea eta EBren trantsizio berde eta digitala bultzatzea da.

Ostiraleko topaketak arkitekturako eta hiri-habitateko proiektu berritzaileetarako arrakasta-kasuak eta finantzaketa-aukerak aztertzeko balio izan zuen, bai eta “made in Euskadi” produktu, arkitektura eta planeamenduaren garapen eta eraldaketa ideia berriak sortzeko ere.