SHIGA proiektuaren helburua Shiga toxina ekoizteko gaitasuna duten Escherichia coli (STEC) anduien azterketa genetikoa egitea da. Toxina hauek osasun publikoan arrisku handia dakarte, elikagaien bidez transmititu baitaitezke, besteak beste esne gordinez egindako gazten bidez. Toxina hauek kolitis hemorragikoa eta sindrome hemolitiko-uremikoa (SHU) eragin ditzakete, ondorio larriak eraginez. Aurreko ikerketek erakutsi dute bakterio hauek bizirik iraun dezaketela gazta ekoizteko prozesuetan eta pasteurizatutako produktuak ere kutsatu daitezkeela, kutsadura gurutzatuaren ondorioz.

Proiektu honek STEC-en detekzio goiztiarra eta kontrolerako estrategiak garatzeko beharra azpimarratzen du. Horretarako, prebentzio-neurriak ezarri nahi dira eta esnekietan STEC detektatzeko metodo eraginkorragoak garatu. Halaber, esneki ekoizleen higiene-protokoloak hobetzeko eta araudi sanitarioak eguneratzeko datu baliagarriak eskainiko dira.

Lehenengo urtean, proiektuaren helburua STEC anduien genoma osoaren sekuentziazioa (WGS) eta analisi bioinformatikoak egitea da, toxina ekoizpenarekin lotutako geneak identifikatzeko eta haien funtzioa ulertzeko. Emaitza baliagarriak lortuz gero, Euskal Herriko elikadura-katean bakterio hauek izan ditzaketen inplikazioak aztertuko dira, eta esneki ekoizleei aplikagarri zaien detekzio-metodo berritzaile bat garatuko da, produktuen segurtasuna eta kalitate-kontrola hobetzeko.

• LEARTIKER Esneki Znetroa
• ELIKA – Segurtasun Mahaia

• Elikagaien segurtasun mailan arazoak sortarazi ditzaketen Escherichia coli anduiak aztertuko dira.
• Gaur egun sekuentziatuta dauden anduiez gain, aukeratutako anduiak eta esnetik datozen andui berriak sekuentziatuko dira, WGS bidez.
• Toxina sortzeko gaitasuna ematen dien geneak aurkituko dira.
• Esne ekoizleak erabili dezaketen detekzio-metodo bat garatuko da.